பாகிஸ்தான் தேசிய நாளுக்குப் பிரதமர் மோடி வாழ்த்து

84

பாகிஸ்தான் தேசிய நாளையொட்டி அந்நாட்டின் பிரதமர் இம்ரான் கானுக்கு இந்தியப் பிரதமர் நரேந்திர மோடி வாழ்த்துத் தெரிவித்துள்ளார்.

இந்தியாவில் இருந்து பாகிஸ்தானைப் பிரித்துத் தனிநாடாக அறிவிக்க வலியுறுத்தி 1940ஆம் ஆண்டு மார்ச் 23ஆம் நாள் லாகூரில் நடைபெற்ற முஸ்லீம் லீக் மாநாட்டில் தீர்மானம் நிறைவேற்றப்பட்டது. இதை நினைவுகூரும் வகையில் பாகிஸ்தானில் மார்ச் 23ஆம் நாள் தேசிய நாளாகக் கடைப்பிடிக்கப்பட்டு வருகிறது. இந்த ஆண்டு தேசிய நாள் கொண்டாட்டத்துக்குப் பிரிவினைவாதிகளைப் பாகிஸ்தான் அழைத்திருப்பதால் இந்தியப் பிரதிநிதிகள் பங்கேற்க மாட்டார்கள் என வெளியுறவு அமைச்சகம் அறிவித்திருந்தது. இதனிடையே பிரிவினைவாதிகள் யாரும் விழாவுக்காக வரவில்லை எனச் செய்தி நிறுவனங்கள் தெரிவித்திருந்தன. இந்நிலையில் பாகிஸ்தான் தேசிய நாளையொட்டி அந்நாட்டின் பிரதமர் இம்ரான்கானுக்கு இந்தியப் பிரதமர் நரேந்திரமோடி டுவிட்டரில் வாழ்த்துத் தெரிவித்துள்ளார்.

அதில் இந்தியத் துணைக்கண்டத்தில் வாழும் மக்கள் அனைவரும் ஜனநாயகம், அமைதி, முன்னேற்றம், வளம் ஆகியவற்றுக்காக ஒன்றிணைந்து பாடுபட வேண்டும் எனக் குறிப்பிட்டுள்ளார். அதேபோல வன்முறையும், தீவிரவாதமும் இல்லாத சூழலை உருவாக்கப் பாடுபட வேண்டும் என்றும் தெரிவித்துள்ளார். இந்த வாழ்த்தை ஏற்றுக்கொள்வதாக இம்ரான்கானும் மற்றொரு டுவீட்டில் பதிலளித்துள்ளார். இருநாடுகளிடையே தீர்க்கப்படாமல் இருக்கும் காஷ்மீர்ப் பிரச்சனை ஆகியவற்றைப் பேசித் தீர்ப்பதற்கு இது சரியான நேரம் என்று இம்ரான்கான் குறிப்பிட்டுள்ளார்.